Kategoriaren artxiboak: ERREZETAK

antiguaOtarraken pintxoak: Tipula mermelada antxoa patearekin


Kaixo!
Esan bezala, aurreko igandean Antiguako San Juan jaietan parte hartu genuen informazio postu bat jarriz. Oso egun polita pasa genuen! Argazkiak hemen sakatuz ikus ditzakezue.
Informazioa zabaltzeaz gain, kontserba ikastaroan prestaturiko errezetekin egindako pintxoak ere eskaini genituen eta arrakasta handia izan zutenez zuekin konpartitu nahi ditugu.
Errezeta hauen bidez, urtaro batean ugari diren produktuak beste garai batzutan eskuragarri izan ditzakegu!Ideia hau oso lagungarria da garaian garaiko eta tokian tokiko produktuak kontsumitzeko erabakia hartu dugunontzat beraz aurrerago ere jarriko ditugu ikasitako errezeta gehiago! Ona hemen gaurkoa:

TIPULA MERMELADA ANTXOAREKIN

Tipula marmelada
Osagaiak: Tipula (gorria hobe), azukrea eta limoia.
Tipulak zuritu, txiki-txiki egin eta su baxuan jarri ondo potxatu arte (2 edo 3 ordu). Behin potxatu eta gero turmixetik pasa eta gero pasa-pure edo txinotik.
Tipula pisatu eta tipula kiloko 400 gr. azukre eta limoi erdi bat erantsi. Berriro sutan jarri loditu arte.
Mermeladak kontserban mantentzeko:ontziak eta tapak egosi (20 min irakiten) eta bero daudela banan bana mermeladaz bete eta 24h buruz bera mantendu. Hilabete pasa ondoren goxoagoak egongo dira!

Antxoa patea
Osagaiak: Antxoak latan, oliba olioa, oliba berdeak, 80 gr. piper gorria (labean egina edo ontziratutakoak)
Antxoen lata ireki eta olioa kendu (olioa ona bada erabili daiteke). Antxoak txikitu eta pisatu; 120 gr. antxoako, 30 gr. olio, 50 gr oliba, 80 gr. piper.
Dena batera turmixetik pasa eta gero pikatzaile elektriko batetik, fin-fina gera dadin.
Pateak kontserban mantentzeko: ontziak eta tapak egosi (20 min irakiten)eta atera. Patearekin bete eta presiozko lapikoan urez estalita 15min eduki.

Pintxoaren muntaia: ogi xigortua, tipula mermelada geruza bat, erdian antxoa pate marra bat eta gainetik ozpin erredukzio tanta batzuk.

On egin!

Kuskusa, oilasko eta barazkiekin

Joan den astean, antiguaOtarrak kontsumo taldeko ekoizleekin egin genuen bilera-afaria, kontsumitzaile eta ekoizleen arteko harremanak sendotzeko. Oso interesgarria eta atsegina izan zen eta sekretua Maritxuk prestatutako afari paregabean egon daitekenez errezeta pasatzen dizuegu:

Osagaiak: (barazkiak zati handietan doaz moztuta beraz kalkulatu zati pare bat bakoitzarentzat)

– Garaiko barazkiak (kasu honetan: patatak, azenarioak, aza eta kalabaza)
– Oilaskoa
– Tipula
– Pasak
– Azukrea
– Kuskusa
– Espeziak: Kurria, kominoa eta kurkuma

Alde batetik saltsa gozo bat prestatzen da, tipula, pasa eta azukrearekin. Nahiko denboraz eduki behar da sutan tipula asko egin eta pasak berriz puzten diren arte.

Bitartean, barazkiak eta oilaskoa zati handietan zatitzen dira eta lapiko handi batean egosten dira ondorengo ordenean: lehendabizi tipula jartzen da olio pixkabatekin eta urez estaltzen da. Jarraian aza eta azenarioa gehitzen zaio eta baita espeziak ere (hauek, bakoitzaren gustuaren arabera baina kominoak du protagonismoa kasu honetan). 15 bat minutu geroago kalabaza eta patata gehitzen zaio eta barazki guztiak egin arte uzten da sutan.

Amaitzeko, oilaskoa eta barazkiak egosi ditugun saldarekin kuskusa egiten da (1/1 neurrian).

Zerbitazeko, barazki bakoitzetik zati bat edo bi, kuskusa, eta kuskusaren gainean saltsa gozoa jartzen da.

Oso errezeta egokia da, hasieran dena txikitzeak lan pixka bat ematen badu ere gero egiten uztea besterik ez bait da! Eta zerbait ez bazaizue argi gelditu, argazki hauetan begira dezakezue!

On egin eta mila esker Maritxu!

Neguko barazkiak

Kontsumo talde baten partaide izanez gero, argi dago zeintzuk diren garaian garaiko produktuak: otarrean datozenak! Baina arrazoi desberdinengatik kontsumo talderen batean parte hartzeko aukerarik ez duenarentzat, hona hemen Euskal Herriko barazki eta frutuen egutegia (Kontsumo iraunkorrerako gidatik hartua)

Ikusiko duzuenez, neguan azak, azaloreak, zerbak (azelgak), kalabaza, espinakak… ditugu. Urtaro bakoitzean barazkiak prestatzeko ikastaroak egitea da gure asmoa, baina bitartean, zer egin nire barazki otarrarekin blogean ideia interesgarriak aurki ditzakezue.

Denon artean, barazkiak prestatzea erraztuko digun bilduma bat sor dezakegu, beraz, denokin partekatu nahi duzun ideiaren bat izanez gero, erantsi iradokizunetan edo bidali antiguaotarrak@gmail.com era eta guk zintzilikatuko dugu.

On egin!

Aste honetako saskian: Potxak!

Atzo otarra jaso eta ze sorpresa! potxak! eta potxekin batera zalantzak: nola prestatzen dira? Baina taldean poliki poliki elkar ezagutzen ari gara eta aurrekoan egin genien bisitari esker Javik ere ezagutzen gaitu! Horregatik ez da detailerik falta izan: potxak errezeta eta guzti iritsi dira! Mila esker Javi & company!
Jarraian potxak prestatzeko errezeta jarri dizuet. Uste baino errazagoa! Eta honekin Errezeten Atala irekita gelditzen da! Bidali zuen errezetak antiguaotarrak@gmail.com era eta blogaren bitartez guztiekin partekatuko ditugu. Edozein errezetak balio du baina gogoratu, beti garaian garaiko eta tokian tokiko produktuekin! Bat baino gehiagori oso ondo etorriko zaigu eta beraz animatu!!!
OSAGAIAK:
– Potxak
– Piper berde bat
– Tipula bat
– Tomate bat
– 4 goilarakada olio
– Gatza
NOLA EGIN:
Kazuelan potxak jarri, osorik gehitu tipula, piperra eta tomatea. Gehitu ura (bi behatz potxa gainetik), olioa eta gatza.
30 minutu su txikian, burbuila txikikin.
Gero berdurak atera eta batidorarekin pure bat egin, berriro potxetara bota eta beste 10 minutu gehiago.
On egin